Cras si festat sa resurretzione de Cristos. E fintzas ocannu Pasca de abrile cumbinat cun su Ramadan, su mese islàmicu de su geunu. Custu mese est comintzadu su 23 de martzu e sos concruos suos sunt su 20 de abrile. Su 2022 sa Pasca “nostra” fiat su 17 de abrile; su mese “issoro” dae su 2 de abrile e a sa prima die de maju. Peruna cumbinatzione su 2021, cun su Ramadan printzipiadu 9 dies a pustis de Pasca manna. Sas duas festas s’ant a atopare finamentas annoas, cun Cristos chi torrat a bida su 31 de martzu e cun su geunu de sos fideles de Maometu chi inghitzat s’11 de su matessi mese pro acabbare su 9 de su mese a pustis. Pro ite a bias emmo e a bias nono? Pro primu cosa b’at de nàrrere – ma est cosa chi ischimus – chi ambas duas religiones sighint su tziclu de sa luna. Sa Pasca cristiana, francu carchi etzetzione, ruet sa prima domìniga a pustis de su primu prenilùniu beranile, chi ocannu fiat su 6 de abrile. Ma su Ramadan no est semper beranile. Ca su calendàriu islàmicu est lunare, s’annu issoro durat 10 o 11 dies in mancu de su solare e duncas cada annu custu mese sacru, su de noe, podet rùere finamentas in àteras istajones. Dae su 2025, pro nàrrere, at a èssere a caddu intre s’ierru e su beranu (dae su 1 a su 29 de martzu); su 2026 at a èssere ierrile (18 de freàrgiu – 19 de martzu) e manu manu torrende a segus. In pràtica, dae su 16 de trìulas d su 622, annu de s’Ègira de Maometu, de s’èsodu suo, sos de cussa fide contant 12 meses de 29-30 dies cadaunu. S’annu islàmicu currente, chi est su 1444, est comintzadu su 30 de trìulas de su 2022. Su 1445 at a comintzare ocannu semper in trìulas, ma su 19 (sos concruos su 7 de su 2024). Semper e cando s’atopu est a tres, ca b’est fintzas sa Pasca ebràica, dae su 5 a su 13 de custu mese. Sa festa de Pesach ruet su de 15 dies de su mese de Nisan, su de 7 de su calendàriu lunisolare ebràicu.
màuru piredda
immàgine de domìniu pùblicu https://pxhere.com/en/photo/1637607