Su guvernu est in chirca de si fàghere dare dae su Parlamentu sa dèlega pro aprontare una riforma fiscale. No est una situatzione noa, antzis, est una manera de traballare a sa lestra e cun pagas concas chi meledant a subra de leges intritzadas in paris, dende unu surcu craru e coerente. Custa protzedura inghitzat cun una rechesta a su Parlamentu in ue su guvernu ammustrat ite est in bidea de fàghere e a pustis sa Camera votat si li dare custu poderiu. Si colat Meloni e sos Ministros ant duos annos pro la presentare. Tando non connoschimus sos piessignos minudos, ma su disignu generale ebbia. Est bastadu custu però, pro fàghere chesciare sas opositziones.
Su progetu est custu: bogare s’IRAP; menguare s’IRES, chi est sa tassa a subra de sos balàngios de sas aziendas; minimare sos controllos contra s’evasione, proende a la evitare prima chi siat fata. Sa mudada prus de importu però paret chi at a èssere a subra de s’IRPEF, sa tassa chi pagant totu sos traballadores. Sa punna est de lòmpere a sa flat tax (una tassa cun sa matessi pertzentuale pro totu cantos, sena diferèntzia peruna intre ricos e prus pòberos), ma fintzas de simplificare sas detratziones e sos “iscalones”.
Sos problemas sunt de duas genias: una econòmica e una polìtica. Pro fàghere riformas de custa casta sos gastos sunt artos meda e b’at s’arriscu chi potzat intrare meda dinari de mancu e chi sos servìtzios istatales, chi sunt giai male postos, nde potzant falare a terra. Dae s’àtera ala, s’opositzione est atachende su disignu, ca, segundu issa, cun una riforma gasi sos ricos ant a pagare su matessi de sos pòberos andende contra a sa giustìtzia sotziale.
Ma in totu custu, ite b’intrat su ponte “sullo stretto di Messina”? In sa matessi reunione, su guvernu at seberadu de torrare a ammanigiare su fràigu de su ponte de Messina. Unu progetu chi agradat meda a su Ministru de sas Infrastruturas, Matteo Salvini, e chi, si totu andat bene, at a inghitzare s’annu chi benit. Ma pro ite custa presse? Ca sa riforma de sa flat tax fiat una chistione de sa Lega, ma chi como l’at a sestare Fratelli d’Italia, su ponte, tando, paret èssere un’iscàmbiu intre fortzas polìticas.
(redatzione)
Leave a comment