Domìniga in dae in antis de sa costera de sa Calàbria est afundada una nae prena de persones. Non s’ischit galu canta gente b’aiat, ma si pensat chi barigaiant sos chentu otanta. Otantunu si sunt sarvados, de sos àteros si sunt agatados sessantabator carasos. De custos batòrdighi pitzinnos. Sa chirca est sighende fintzas a tesu, ca su mare fiat avolotadu meda e de sos chi abarrant pèrdidos b’at s’arriscu de no agatare totu cantos.
Dae su chi sunt cumprendende sos sucurridores, est gente chi fuiat dae Paisos in gherra o in pilisu: Afgànistan e Siria, ma fintzas dae s’Iran e dae su Pàchistan, chi non sunt in gherra, ma nemmancu seguros. Logos in ue sa morte de chie cheret èssere lìberu est fàtzile pro neghe de sos guvernos, de sos integralistas e de sos sordados. Logos in ue sa defensa est impossìbile e sa rènnida faghet ammachiare. Non si podet giudicare dae su privilègiu nostru s’ischerta de fuire. Non si podet e non si diat dèpere.
A lenu a lenu s’imprenta est contende su chi est acontèssidu. A sas 22,23 de sàbadu note un’aèreu de Frontex (sa fortza europea de bàrdias de sas làcanas europea) bidet sa barca in dificultade in su mare a setanta chilòmetros dae sa terra. Cun sos traste suos s’abbìgiat chi est prena de gente e chi b’at telefoneddos. S’aèreu colat s’informatzione a sa Bàrdia costiera, fortza a suta de su Ministru de sas Infrastruturas, chi però non si movet e non dat mancu su SAR, un’ispètzia de bandu a chie est serente e podet agiudare. Non b’intrat su mare in abbolotu, in su 2013 at sarvadu in sa matessi costera una barca cun mare fortza oto. Sa bàrdia costiera, difatis, tenet sas moto-vedetas classe 300, famadas cun su nùmene “inaffondabile”, in sa zona bi nd’at duas. Pro ite non sunt tzucadas?
Chie proat a tzucare, a s’imbesse, sunt duas moto-vedetas normales de sa Bàrdia de finantzia ma non renessent a s’acurtziare pro su mare malu.
Sas naves de sas ONG fiant arressadas in su portu de Augusta pro chistiones burocràticas.
Colat su tempus e prus o mancu a sas chimbe de mangianu lompet sa noa chi sa nae s’est segada e est afundada a dughentos metros dae sa costera de sa Calàbria. Tempus prima sos iscafistas ant betadu a mare binti persones. In cussu momentu ebbia inghitzant sas atividades de sucursu.
Sessantabator mortos, de custos, batòrdighi pitzinnos.
Gabriele Tanda
Leave a comment