Sos operadores de s’ISPRA nch’ant bogadu duas tonnelladas de arga dae sos fundales de duos giassos marinos protetos de Sardigna. L’ant fatu cun su progetu MoRiNet, “Monitoraggio, censimento, raccolta e avvio al riciclo delle reti fantasma” (in sardu, “Supervisione, tzensimentu, regorta e incaminamentu a su retziclu de sas retzas pantuma”), congruidu a pustis de un’annu e mesu de chircas, collìngios e anàlisis.
Cun custu progetu ant sedatzadu sas abbas de duos tretos pilota de sas costas de Sardigna: su giassu marinu protetu de su Parcu de s’Asinara, e su giassu marinu protetu de Cabu Carbonara, sa prima in su Cabu de susu e sa segunda in su Cabu de giosso.
Sos resurtados de su traballu faghent ispantu. Ant agatadu retzas pro tragiare, trastes pro piscare pèrdidos o abbandonados, bullentinos, tramìngios, òbigas, latinas, ampullas de bidru e de plàstica, pneumàticos. Un’istèrrida de refudos chi fiant ispartzinados in sos fundales dae annos.
In sa prima fase de su progetu ant caraterizadu sos duos giassos in tèrmines de biodiversidade , ant assebertadu sos refudos e ant avaloradu s’impatu issoro in s’ambiente. Ant fatu finas campionamentos de sas microplàsticas e collìngios biòpticos dae sos tzetàtzeos.
In sa de duas fases, cun s’agiudu de su nùcleu de sos Carabineris subàcueos e de sos piscadores, ant collidu s’arga.
Pro sa de tres fases aiant prevididu su retziclu, ma pro su prus de sas cosas chi ant collidu no est istadu possibile a las torrare a impitare, ca fiant ruinadas dae su tempus o colonizadas dae organismos marinos. S’ùnica cosa de fàghere, tando, fiat a las destruire.
(sa redatzione)
Leave a comment