– de Salvatore Serra –
Die aberta pro s’epilessia. L’ant ammaniada in Tàtari, pro mèrcuris 22 de freàrgiu, in su Tzentru pro sa diàgnosi e sa cura de s’epilessia de s’edade evolutiva de sa Neuropsichiatria infantile de s’Aou.
Dae sas noe de mangianu a sas ses de sero, in s’ambulatòriu de viale de Santu Pedru, sos tzitadinos podent fàghere vìsitas e esàmenes, e àere informatziones subra de sas patologias epilèticas.
B’at, in programma, registratziones eletroentzefalogràficas e sas prima vìsitas. Tocat a pagare s’intrada, e pro custu si cussìgiat de telefonare a su nùmeru 079 229322. In prus b’at, sena pagare nudda, unu puntu informativu in ue sos espertos torrant imposta a totu sas preguntas.
In Sardegna b’at unas 12mìgia pessones malàidas de epilessia e prus de 6mìgia sunt sas chi nde sufrint in edade evolutiva.
Su Tzentru epilessia de s’ Aou de Tàtari – chi antiannu at tentu su reconnoschimentu de tzentru mèdicu de su de tres nivellos pro sa diàgnosi e sa cura de sa patologia in s’edade infantile – rapresentat a beru unu puntu de referimentu pro unos 2mìgia malàidos. S’istrutura, in ue b’at in mèdia duas diàgnosis noas de epilessia cada chida, est ativa dae su 1995 e sighit sos malàidos dae sos primos meses de vida finas a sos 18 annos.
Su Tzentru collàborat cun sas mègius istruturas italianas de Chirurgia de s’epilessia, e su nùmeru de sos operados est unu de sos prus artos in Itàlia e in Europa.
(sa redatzione)
Leave a comment