Sos carabineris ant iscobertu unu grupu terrorista fascista in Torpè. Sos arrestados sunt bator e ùndighi sos chi sunt a suta de cherta de sa giustìtzia. Sas fortzas de s’òrdine ant agatadu armas, soddos e materiale chi glòriant su fascismu e sa violèntzia polìtica. Su grupu si mutiat Fronte Legionario Sardo e in custos annos – narant sos carabineris – at regortu dinari peri isrobatòrios e cummèrtziu de droga. Cun sos soddos balangiados ant comporadu armas e bombas pro fàghere a tìmere a sas istitutziones e sos polìticos de su logu, ma fintzas immigrados e tzitadinos comunes.
S’iscumbata fiat tzucada dae una bomba chi no aiat tzocadu agatada, cun unu volantinu, dae sos carabineris a curtzu de unu sègiu eletorale in su 2019 in Torpè. Su manifestu polìticu si la leaiat contra a sos immigrados e a sas istitutziones europeas e naraiat chi luego diat àere inghitzadu una luta armada si su guvernu non aeret sighidu sos inditos de su grupu. S’iscumbata at iscobertu sos chi nde faghiant parte e sas proas de ite aiant fatu: atos violentos contra a tzitadinos e minetzas a sas istitutziones, in su 2019 fintzas duos a su mese.
(redatzione)
Leave a comment