Sa Reanimatzione at torradu a funtzionare in manera regulare in s’ospidale Sirai de Carbònia.
Lu faghet ischire sa Asl de su Sulcis.
In custa dies coladas, pro more chi, totu in unu, in una manera chi nemos si l’isetaiat, si fiant ismalaidados tres dutores, a mala bògia nch’aiant dèpidu tramudare sos malàidos a àteras istruturas, e su repartu fiat abbarradu abertu sceti pro sas urgèntzias chi bi podiant èssere. Sa diretzione de sa Asl at postu in andare totu sas protzeduras chi bi cherent pro assegurare chi s’atividade de su repartu torret comente fiat in antis.
Pro su chi pertocat sa situatzione de sa Reanimatzione de su Cto de Iglèsias, sa Asl etotu pretzisat chi “abbarrat aberta pro assegurare su manìgiu de totu sas urgèntzias ostètricas e chirùrgicas. Cunforma a su nùmeru atuale de dutores, non benit bene a assegurare turnos de guàrdia ativa in sos duos presìdios, e duncas su diretore de su repartu at propostu una reorganizatzione interna temporànea, e una (semper temporànea) remodulatzione de sos postos a corcare in sos duos presìdios “.
(sa redatzione)
Leave a comment