Sa pelea sighit dae custu mangianu e pertocat mescamente sos collegamentos Internet dae lìnia fissa. Ma no est un’atacu informàticu su chi at causadu problemas a mìgias de utentes, prus a prestu una farta de interconnesione internatzionale.
Medas de a beru sas signalatziones dae sa Sardigna e finamentas dae s’Itàlia intrea (prus de 7 mìgia), totu cantas acomunadas dae s’impossibilidade de atzèdere a sa rete Internet dae lìnia fissa; semper e cando unos cantos utentes ant signaladu problemas finamentas dae rete mòbile.
S’azienda at datu a ischire chi est traballende pro risòlvere sos guastos cantu prima. Esclusu dae sa Politzia Postale s’atacu hacker: issa puru sustenet sa tesi de sa farta tècnica.
E de su matessi pàrrere est Stefano Epifani, presidente de sa Fondazione Sostenibilità Digitale, intervistadu dae Rai News 24: «Su problema – at naradu – no paret èssere un’atacu hacker. Ma est craru chi non mìnimat su livellu de discumbèniu. Un’istima realìstica nos narat chi sa capatzidade internet in Itàlia est de su 30% in mancu. Sas cunsighèntzias sunt mannas. S’ispera est chi totu siat a apostu intro de cras mangianu, ma carchi duda sigo a bi l’àere».
Gianfranca Orunesu
(Foto publicdomainpictures.net)
Leave a comment