Acòrdios Lìbia-Itàlia: su gas “a noi” e sos migrantes tenide·bos·los

«Sai dove s’annida più florido il suol? / Sai dove sorride più magico il sol? / Sul mar che ci lega con l’Africa d’or / La stella d’Italia ci addita un tesor». Custa cantzonedda isciovinista tricolore diat pòdere èssere sa colunna sonora perfeta pro sos afàrios tripolitànios de su XXI sèculu. Sa frama de su guvernu de dereta est bene tenta, a su presente, e su «bel suol d’amore» torrat a campu pro animare sos sentidos patriòticos de sos frades de Itàlia abbaidende a chirru de giosso. E torrat a campu cun duos acòrdios in pessu istèrridos. Su primu pertocat su gas de “nos” nche pigare; su segundu sos cristianos de nche lassare in cue.

Su gas.

In s’acordu energèticu, firmadu dae s’amministradore delegadu de s’ENI Claudio Descalzi e da Farhat Bengdara, presidente de sa National oil corporation (NOC), sa cumpangia petrolìfera natzionale de sa Lìbia, si faeddat de potentziamentu de su frunimentu de gas cun un’investimentu de 8 milliardos de dòllaros. Sas duas aziendas ant a collaborare pro compidare duos depòsitos chi diant dèvere àere riservas bastantes pro nch’illiberare 8,7 milliardos de metros cubos de gas in 25 annos. Sa punna diat dèvere èssere sa de garantire un’esportatzione prus manna a dae chi, a su presente, sa crèschida de sa domanda interna nch’at fatu colare in su Green Stream Mellitah-Gela petzi 2,5 milliardos de metros cubos su 2022 (de sos 6 chi diat pòdere).

Sos migrantes.

S’àteru acòrdiu previdet sa cunsigna a sa Guàrdia costera lìbica de chimbe motovedetas noas pro «gestire» sos flussos migratòrios, est a nàrrere pro firmare sas mòvidas dae cue. Semper sa matessi chistione duncas: sas torturas e sas mortes podent èssere bajuladas in terra africana fintzas pro chi non nos tochet s’infadu de bìdere carenas a modde gherrende cun s’inferru biaitu e salmastru. Sa chistione migratòria est però contada sighende·bi·la cun sos benefìtzios de su primu acòrdiu e de su “pianu Mattei” ca, de custa manera, sos investimentos in Àfrica diant serbire a s’isvilupu locale intzentivende sos de cue a non si nche fuire. Comente chi dae sos tretos petrolìferos de Nigèria (in ue bèntulat su tricolore) non nche nde fuat de gente…

màuru piredda