Su 15 de ghennàrgiu de su 1849 naschiat in Tàtari Luigi Canepa. Fiat fìgiu de una famìllia de ratza genovesa. Giai a pitzinneddu minore aiat mustradu unu talentu musicale mannu, tantu chi su babbu e sa mama nche dd’aiant mandadu a istudiare a Milanu, a su cunservatòriu, cando teniat 10 annos ebbia.
Dae Milanu aiat sighidu sos istùdios in Nàpoli. Una borta diplomadu in Milanu aiat cumintzadu sa carriera de cumposidore. Sa prima òpera, Davide Rizio, l’aiat iscrita a 20 annos, cun sa collaboratzione de Enrico Costa, chi aiat iscritu su librete.
Paris cun s’atividade musicale aiat mandadu a in antis sa passione polìtica, chi l’aiat bidu comente parte ativa de un’ispeditzione garibaldina.
A trinta annos fiat torradu a sa tzitade nadia in ue aiat fatu su professore e su diretore de orchestra. In su 1880 l’aiant afidadu sa diretzione de su Civico Istituto Musicale, chi aiat regortu s’eredidade de sa Scuola Gratuita di Canto e Suono, nàschida in su 1862 semper pro more de s’amministratzione tzìvica.
Su nùmene de Canepa dae tando at a abarrare ligadu a su de sas istitutziones musicales tzitadinas.
S’istitutu in s’ìnteri aiat serradu e fiat torradu a nàschere comente Istituto Musicale Sassarese e in su 1895 fiat nàschida sa Scuola di Musica di Sassari, afidada a sa diretzione de su musitzista. Finida custa esperièntiza fiat nàschidu, galu cun Canepa, s’Istituto Musicale.
Luigi Canepa moriat, semper in Tàtari, su 12 de maju de su 1914 e, finida sa gherra, s’Istituto Musicale, in su mentras torradu galu una borta a nàschere, li fiat istadu intituladu.
S’istitutzione, sa prus importante pro sa mùsica in sa capitale turritana, at sighidu a cambiare nùmene finas a sa fine de sos annos ‘60: Civico Liceo Musicale, Liceo Musicale, Liceo musicale pareggiato. In fines, in su 1968 est bènnidu a èssere Conservatorio Statale di Musica Luigi Canepa.
(luca foddai)
Leave a comment