Su pintore Giuseppe Biasi est nàschidu in Tàtari, in una famìllia de ratza vèneta, in su 1885. A làure in Leges no l’est mai serbida bidu chi giai a pitzocu aiat cumintzadu a si dedicare a s’arte figurativa.
Sa prima collaboratzione importante est cun Il giornalino della domenica de Vamba, s’autore de Il giornalino di Giamburrasca.
A pustis collàborat cun Grazia Deledda in L’illustrazione italiana e La lettura.
Paris cun s’iscritora nugoresa e àteros intelletuales sardos contemporàneos cumpartziat s’idea de fàghere a connòschere s’Ìsula in sa realidade sua, liberende·la dae sos istereòtipos negativos chi tzirculaiant in s’ambiente italianu. Sa Sardigna in sos cuadros suos non fiat duncas unu logu de misèria ma de mistèriu e de traditzione.
In su 1909 aiat partetzipadu comente pintore a sa Biennale de Venètzia. A pustis de àere bogadu fama però sos gustos estèticos in Itàlia fiant cambiados e aiat duncas detzìdidu de mòvere a Àfrica, in sa parte nord de su continente, in ue fiat abarradu pro bator annos, dae su 1924 a su 1927.
Torradu a domo sa situatzione non fiat cambiada e fiat istadu postu a un’ala dae su mercadu de s’arte pro su regionalismu suo. S’òpera de Biasi difatis si caraterizat pro un’atentzione a totu su chi est cunsideradu folkore, massimamente de Sardigna, ma de su Magrèb e de s’Egitu puru. S’esotismu fiat passadu de moda.
In su 1937, pro more de s’èsitu de una mustra, aiat istabilidu unu cuntatu cun su mercadu de Biella. Pròpiu in ie, pagu dies a pustis de sa fine de sa Segunda gherra mundiale, l’aiant mortu sos partigianos cun s’acusa de collaboratzionismu cun sos tedescos, pro s’adesione sua a sa Repùblica Sotziale Italiana.
De Biasi sunt sas pinturas de s’istatzione ferroviària de Tèmpiu e de su tribunale de Tàtari. Semper dae una figura de s’artista est istadu fatu su mosàicu de sa crèsia de Fertìlia.
(luca foddai)
Leave a comment