Eris in Roma sos sindacados de sa sanidade ant manifestadu contra a sas medidas de su guvernu e mescamente contra a su gastu programmadu pro sa sanidade pro sos annos imbenientes. Ischimus chi in Sardigna sa sanidade fiat unu problema fintzas in antis de sa pandemia, como est peorende cun sos apretos de s’ispidale de Sorgono e sos mèigos de famìllia chi fartant a sighidura. Ma sos datos chi essint a campu dae sa manifestatzione ponent pidinu mannu.
Su gastu pro sa sanidade at a falare a su 6,1% de su PIL, s’OCSE narat chi su livellu lìmite pro mantènnere su funtzionamentu de su sistema est su 6,6%, sa mèdia de sos àteros Paisos europeos est de 11,3%.
Sos sindacados denùntziant chi dae su 2010 a su 2020 ant tancadu chentu ùndighi ispidales e chentu trèighi prontos sucursos, ma mescamente sunt iscumpartos trintasete mìgia letos pro sos patzientes. Custu at produidu unu muntone de gente malàida chi andat in sos repartos de apretu o in sas bàrdias mèigas. Sas sigundas sunt tanchende e tando su prus andant in sos prontos sucursos, chi ant unu carrigu de gente tropu mannu. Pro custu sos servìtzios sunt peorende a sa lestra e sas cunditziones de traballu pro sos dutores puru.
Sos mèigos traballant tropu oras, cun una responsabilidade tropu manna, in istruturas chi non lis garantit servìtzios lestros: gosi s’arriscu est tropu mannu. In prus como s’est ispartzinende sa figura de su dutore a getone. Unu professionista chi traballat a mutida de sa ASL e chi benit pagadu petzi pro sas giorronadas chi faghet in sos ispidales. Su problema est chi benit pagadu meda de prus de unu dutore chi traballat cada die in su prontu sucursu cun s’òbligu de oràrios pesosos e de sa presèntzia fitiana. Pro nos cumprèndere unu mèigu de s’ispidale est pagadu tres mìgia èuros netos a su mese, cun su 43% de tassas; su dutore a còtimu leat prus o mancu milli èuros a sa die. Su resurtu est chi mèigos medas si nde sunt fuende dae sos ispidales e sunt intrende in custas aziendas privadas. Sa situatzione in su mentres est peorende prus in presse, ca gasi su gastu de sa sanidade creschet de prus.
Ma in antis de cundennare sos dutores, in antis de inghitzare un’àtera gherra contra a sas persones isballiadas, nos depimus preguntare carchi cosa: chie est chi fatende su matessi traballu, e podet ischertare intre duas pagas gasi diferentes, sèberat sa peus? De chie est sa responsabilidade de sa nàschida de custu sistema faddidu fintzas in Sardigna? Cal’est sa punna de sas riformas sanitàrias de sos ùrtimos annos?
(redatzione)
Leave a comment