Su bintighimbe de custu mese est istadu seberadu comente premier nou de su guvernu inglesu Rishi Sunak, sa prima persone asiàtica e indù in custu rolu. Sa noa podet ispantare, ma est giustu chircare sas raighinas de custa acontèssida.
Sunak est frutu de cussos indianos impitados dae s’imperu inglesu pro ammanigiare sas colònias africanas. Gente chi fiat ligada prus a sos colonizadores chi a sas populatziones africanas sutapostas a cussu poderiu. Chi, mancari manteniat sas traditziones issoro, istudiaiat in sas iscolas inglesas e non si cheriat ammisturare cun sos nieddos africanos, antzis si cheriat partzire in manera funguda dae cale si siat simigiàntzias cun issos.
Connoschende s’istòria ispantat unu pagu de mancu s’ischerta de sos cunservadores inglesos. Comente no ispantat sa lìnia tètera contra a sos immigrados africanos de sa Segretària de s’Internu Suella Braverman, fintzas issa indiana-africana: sa proposta est cussa de los deportare a Rwanda cun unu ponte aèreu.
Comente càpitat a fitianu b’at gente prus mala de su mere: est s’iscrau chi si cheret pònnere su bestire de su chi cumandat e bàrdiat. E non petzi in Inghilterra.
(redatzione)
Leave a comment