Martis coladu in unu ambulatòriu de sa Clìnica de maladias infetivas de s’AOU de Tàtari ant iscobertu unu casu de pigota de sas martinicas. Su patziente, bisitadu dae sos dotores de s’istrutura direta dae professor Sergiu Babudieri, presentaiat sas fertas de sa maladia, e pro cussu ant fatu sos prelievos e los ant imbiados a sa Virologia de s’AOU de Casteddu chi, martis sero, at dau èsitu positivu. Su patziente istat bene e est in domo sua.
Sa maladia, sutalìniat su diretore de Maladias Infetivas, non rechedet ricòveru ne assistèntzia ospedaliera particulare.
Su Ministeru de sa salude at ativadu unu sistema de sorvegliàntzia de sos casos cun Regiones e Provìntzias Autònomas, publichende dae eris unu Bulletinu su martis e sa chenàbura.
Pro commo in Itàlia, a pustis de su primu casu cunfirmadu su 20 de maju, sunt 505 in totu sos casos seguros. S’AOU dat a ischire chi sa maladia si trasmitet cun sa salia, pìngios, lentzolos, istèrgios e àteros trastos contaminados dae su virus, e cun sos flùidos corpòreos de una pessone impestada.
Mariantonietta Piga