Su Ministèriu de sa Sanidade at publicadu sa relata de s’annu coladu a subra de sas nàschidas in s’Istadu. Si s’Itàlia at una mèdia de 6,8 pitzinnos nàschidos cada milli fèminas chi los podent fàghere (unu nùmeru bàsciu) in Sardigna custu nùmeru est de 5,2. Si in Itàlia onni fèmina in mèdia tenet 1,25, in Sardigna su nùmeru falat a 0,99. Cun custos nùmeros sa Sardigna est sa terra cun prus pagas nàschidas in su mundu intreu.
Custu datu cunfirmat su chi s’ischit dae meda, ma chi como leat una gravidade chi assuconat. Su pòpulu sardu est iscumparende. Sa Regione at seberadu de dare un’agiudu a sas famìllias pro cada fìgiu, ma est unu gùtiu in unu desertu. Difatis sas resones pro custos nùmeros sunt medas e pertocant cultura, sotziedade e mescamente economia, ma forsis non bastant pro cumprèndere custa andanta chi giughet raighinas prus fungudas.
(redatzione)
Leave a comment