Pro duas leges regionales arribat sa botzadura de su Consìgiu de sos Ministros, sa de 15 dae cando Christian Solinas est su Presidente de sa Regione.
Custa borta su ricursu a sa Corte Costitutzionale pertocat su provedimentu pro sa promotzione de sa cannabis sativa, e cussu chi creschet dae 3 a 4 sos mandados de sos sìndigos de sos comunes fintzas a 3 mìgia abitantes, dae 2 a 3 cussos de sos sìndigos dae 3 a 5 mìgia abitantes, e chi mudat sas règulas de reclutamentu de sos segretàrios comunales.
Ambas leges su Consìgiu regionale las at a provadas su 30 de martzu e su guvernu las at botzadas pro una chistione de cumpetèntzias Istadu-Regione.
Sa prima, cussa subra de sa coltivatzione e filiera de sa canapa industriale, chi ponet paris duas propostas de su Movimentu 5 stelle e Psd’Az, l’ant impugnada ca unos cantos disponimentos non sunt de cumpetèntzia de sa Regione, violande s’Artìculu 117 de sa Costitutzioe e s’Artìculu 81 chi pertocat sa copertura finantziària.
Pro s’àtera, sa lege regionale subra sos mandados de sos sìndigos, su guvernu cuntestat a sa Regione de àere violadu torra s’Artìculu 117 de sa Costituzione, essende fora dae sas cumpetèntzias de s’Autonomia de sa Regione.
Mariantonietta Piga