Su chi forsis est su guvernu su prus a manca de Europa, est a nàrrere su de su sotzialista Pedro Sánchez, in s’istadu ispagnolu, at aumentadu sa tzifra destinada a sos gastos militares. Tzifra chi nche colat 12 milliardos, su 25% in prus cunforma a s’annu coladu. Sa ministra de sas Finàntzias María Jesús Montero faeddat de «22.667 empleos» sighende su format ocupatzionale chi connoschimus bene meda in Sardigna in contu de indùstria bèllica. Ma su chi no at pòdidu cuare – semper chi no l’apat naradu cun grandu cumbintzione – est chi «los compromisos del presidente se cumplen».
Sos «compromisos», est a nàrrere sos impignos pro nche lòmpere a su 2% de su Pib intro de su 2029. Impignos cun sa Nato, craru. Unidas Podemos faeddat de «deslealtad del Psoe», de «aumento unilateral» e de «vergüenza». Però assegurat chi «nosotros no vamos a romper el gobierno». Astensione manna in vista e crèschida de Vox. Pellìcula in pessu projetada in s’istadu italianu, in ue manca e manca de mancu sunt ammustrende unu ventàlliu de positziones a sos eletores (e mescamente a sos ex eletores) suos in contu de paghe e de gherra.
Comintzemus faeddende de su Partidu democràticu. Enrico Letta, su 13 de custu mese, nch’est lòmpidu addainantis de s’ambasciada russa. S’arresonu una lògica sua la tenet: cunsiderende petzi sa спецоперация, s’opratzione ispetziale putiniana ebbia, est beru chi b’at un agressore e un’agredidu. Ma Letta est su matessi chi, in cumpangia de Matteo Salvini, de Antonio Tajani e àteros, manfesteit a sustegnu de Israele cando chi fiat Bibi Netanyahu a aprontare e a acumprire s’operatzione bèllica sua in Gaza. Fiat su mese de maju de s’annu coladu e s’istadu ebràicu nânt-chi fiat rispondende a sos coetes palestinesos pagu prus o mancu comente Putin at naradu de fàghere a pustis de s’autobomba a su ponte de Crimea.
Indainantis de s’ambasciada russa, su 7, b’at àpidu unu sit-in ammanidau dae su Partidu comunista de sos traballadores e dae Sinistra crìtica: su partidu de Marco Ferrando, su 2014 (cosa chi non fadeit su Pd) manifesteit in suta de s’ambasciada ucraina a s’in cras de sas acontèssidas de pratza de Maidan e de sas framas de Odessa «contra a su nazismu e a su capitale, cun sa classe operaja ucraina». Ferrando, chi su 2006 nche lu bogheint dae sas listas de Rifondazione ca aiat difesu su deretu de sa resistèntzia irachena contra a sas trupas ocupantes (fintzas sas italianas), como est pro chi sos ucrainos si pesent contra a sos invasores sena però sustènnere politicamente a «su guvernu reatzionàriu de Zelensky» (gasi comente in Iraq non proponiat su sustegnu a Sadam).
Prus pagu crara sa positzione de Unione popolare chi in campagna eletore at retzidu sa beneditzione de Pablo Iglesias de Unidas Podemos. Rifondazione e Potere al popolo sunt contra a sa Nato (Luigi De Magistris est pro la «superare», forsis punnende a un’esèrtzitu europeu?) ma sunt culu e raga cun una formatzione polìtica chi, comente amus bidu, si nch’abarrat cun bator ministros in intro de unu guvernu chi acreschet sos gastos militares. De su restu Rifondazione, guvernende, voteit a favore prus de una borta a favore de s’aumentu de s’ispesa bèllica innantis de si nch’interinare in s’extraparlamentarismu obtorto collo. Cara a custa gherra sas crìticas a Zelensky sunt prus de sas chi cada tantu sunt indiritzadas a Putin. Custas ùrtimas belle semper comente premissa a tipu «Io non sono putiniano ma…». Sa narratzione de s’ex ministru de Rifondazione Paolo Ferrero, pro nàrrere, est esemplare e sighit su chi naraiat Bertinotti narende chi sa resistèntzia irachena de su 2003 fiat «cun sa r minùscola». Pro parte sua Luigi De Magistris at faeddadu de «atos terrorìsticos — pro su ponte de Crimea — chi ingendrant àteros atos terrorìsticos». Semper e cando, manifestatzione eris in Milanu, ma finamentas su 5 de santandria.
Italia sovrana e popolare at manifestadu eris in Roma e bi l’at a sighire su 22 in Milanu narende chi nono a sa gherra e a sas bulletas «chi ochient a su pòpulu italianu». Pòpulos ucrainu e russu in peruna riga de s’apellu issoro, a cunfirmare sa furriada prus chi non natzionalista italiana de Marco Rizzo, s’ex europarlamentare de su Pdci, partidu chi non si nch’esseit dae su Guvernu D’Alema in tempos de assàchiu Nato a sa Sèrbia.
In fines su Movimento 5 stelle in s’ùrtima versione sua comente fortza polìtica de manca. In pratza a metade santandria cun Acli e Arci ma «fintzas sena banderas de partidu». Sustegnu a s’autodifesa de su pòpulu ucrainu narat Conte, chi cheret però chi torret in agenda sa chistione diplomàtica in Europa cunfirmende in su matessi tempus sa positzione sua atlantista. E màssima cunfiàntzia in s’Europa (cale?) finamentas dae parte de Alleanza Verdi Sinistra cun Nicola Frantoianni chi lamentat su protagonismu de Erdogan e non de su continente.
E in Sardigna? Sa nostra no est una natzione-istadu; non b’amusu unu guvernu ma una Giunta chi non delìberat in contu de polìtica èstera; non tenimus un’esèrtzitu ma inoghe b’at annestru bèllicu mannu dae parte de sos esèrtzitos Nato. Sa manifestatzione contra a sa gherra la faghent oe sos de A Foras chi, in totus custos annos, sunt istados sos chi prus ant gherradu contra a sa militarizzatzione de s’ìsula. Ca est craru chi s’escalation militare nos interessat.
Est a rispòndere a sa pregonta si cherimus èssere una portaerei de una potèntzia belligerante in su chi si diat pòdere tramudare in su de tres cunflitos mundiales. Sos chi sos mèdios etichetant a sa grussera comente anti-militaristas, in su comunicadu de eris narant de chèrrere «una furriada cunforma a sa polìtica bellitzìstica de Nato, Rùssia e Ue». B’at chie lis pretendet paràulas prus craras contra a s’invasione russa, comente at fatu Omar Onnis dae su blog suo. Ma est craru finamentas chi in custa terra non b’amus bases e polìgonos controllados dae Mosca.
De cada manera finamentas sa dibata sarda sufrit sa mancàntzia de un’allega internatzionale. In custa època de gherra intre unipolarismu e multipolarismu (Marco Santopadre dae pagas dies nos est contende finamentas de sa «Nato àraba») su de nche rùere in sos bratzos de Washington o de Mosca est unu perìgulu prus chi non mannu. In mancàntzia de una boghe internatzionale de sos traballadores (sa majoria de sa populatzione mundiale) indipendente, semus sugetos a nos pònnere una divisa.
Hugo Chávez, su 2007, proponeit sa formatzione de sa de 5 Internatzionales e su de no èssere nemmancu nàschida cunfirmat cantu su presidente venetzuelanu, mancari sende bona s’idea, fiat presu a sas dinàmicas campistas, a sos Paisos Brics, a «Hermano Mamhoud Ahmadinejad» e àteros. Non podiat acontèssere e non b’at àpidu peruna Internatzionale. Ma est su chi biat chèrrere pro chi, cunforma a sa traditzione chi auniat sos de Zimmerwald a sos rivolutzionàrios chi nde bogheint sa Rùssia dae sa gherra su 1917, s’isvilupent mègius sas allegas in contu de paghe e de gherra, de annessiones e de autodeterminatzione, de sustegnu a sas resistèntzias angenas e de contrariedade a sos guvernos pròpios, de opositzione parlamentare e de guvernismu.
màuru piredda
Leave a comment