Est capatze de giogare a murra e si narat Gavina 2121. Sinnos de importu: est unu robot. Fìgia de su predetzessore Gavin 1.0 – nàschidu in su 2010 pro more de unu esperimentu didàticu de una classe de s’Istitutu casteddaju Giua – at a èssere in Orthullè su 23 de austu pro su de 23 disafios natzionales de murra.
Unu grupu de chircadores (assòtziu culturale “Sociu po su jocu de sa murra”, dipartimentu de Pedagogia, Psicologia, Filosofia de s’Universidade de Casteddu, Iscièntzias biomèdicas de s’Universidade de Tàtari e Multisensory Laboratory de s’Universidade USA Lawrence Technology) cheret istudiare sas peculiaridades de custu giogu antigu pro mèdiu de unu progetu iscientìficu chi si narat “Il gioco della morra tra scienza e cultura”; s’obietivu est pònnere a cunfrontu s’inteligèntzia artifitziale cun sas abilidades umanas.
Unos cantos cumponentes de su team ant a èssere in Orthullè a sas 18, in s’anfiteatru de prata Funtana Bècia, in ue ant a èssere fatos sos istùdios subra de sa mente umana dae su cumintzu a sa fine de su disafiu. B’at a èssere finamentas su primu tzitadinu Ennio Arba chi, paris cun sa Giunta, tra carchi die at a dare sa tzitadinàntzia onorària a Gavina.
Gianfranca Orunesu
(foto Ansa)