At a essere una Pasca salida meda pro sos sardos: sa neghe est de un’inflatzione chi curret prus lestra rispetu a sa mèdia natzionale, mancari cun valores prus bassos rispetu a àteras regiones italianas. A lu nàrrere Adiconsum Sardigna, s’assòtziu chi amparat sos cunsumidores, esaminende sos datos ISTAT de martzu subra de s’inflatzione, chi in Sardigna bidet unu aumentu de sos listinos a minuju de su 6,8% contra a sa mèdia italiana de su 6,5%.
Pro la nàrrere cun sos nùmeros: pro una famìlia tipu residente in Sardigna sunt 1800 èuro in prus cada annu. E est torrende a crèschere su prètziu de su carburante, cun aumentos chi Adiconsum definit ispeculativos.
“Sos datos de s’ISTAT cunfirmant sos allarmes nostros subra de s’aumentu de sos prètzios in Sardigna e su fatu chi inoghe sos listinos a minuju creschent prus in presse rispetu a su restu de Itàlia, – narat Giorgio Vargiu, presidente Adiconsum Sardigna – aumentos chi sunt sighende in custas dies puru, e chi s’ant a pagare in su pràngiu de Pasca, rendende sas festas nostras meda prus salidas”.
Mariantonietta Piga