Dedicare sa setziada imbeniente de s’Assemblea regionale a cumprèndere ite cheret fàghere su presidente de sa Regione e sos assessores a pustis de unu mese e mesu dae s’òrdine de traballos, pro sa die, aprovadu a s’unanimidade in Cussìgiu regionale, chi impinnat s’esecutivu a rimediare a sa botzadura de sa Lege de su pianu pro sa domo, fata dae sa Corte Costitutzionale.
Sa rechesta, formalizada in una lìtera indiritzada a su presidente de su Cussìgiu regionale Michele Pais, moet dae su capugrupu de sos Progressistas Francesco Agus, chi acusat sa Giunta de bandidare, a dolu mannu de totu su setore de s’edilìtzia.
“Sa Giunta no at rispetu pro sos bisòngios de unu cumpartu produtivu intreu, ma mancu pro su traballu de su Cussìgiu regionale. – sutalineat Agus – Non si podet bajulare chi non si leet in perunu cunsideru su documentu sutascritu dae opositzione e magioràntzia”.
Sos Progressistas pedint cun urgèntzia unu cunfrontu in àula cun su presidente de sa Regione Christian Solinas pro isòrvere sa chi paret un’àtera pelea pro s’economia sarda. Custu finas si, in Cussìgiu regionale, pro totus fiat crara s’urgèntzia de una dispositzione pro prenare su bòidu normativu in tema de guvernu de su territòriu.
“Commo – denuntziat Agus – s’atividade de su setore edilìtziu resurtat cunditzionada meda dae sas dudas normativas e dae sas chistione pesadas dae sa Corte Costitutzionale”.
Mariantonietta Piga
Leave a comment