Custu mangianu, in s’àula Z de sa facultade universitària casteddaja de Ingegneria e Architetura, b’est istada sa premiatzione de sa finale “Jeopardy – Cyberchallenge 2022”; unu disafiu de seguresa informàtica, custu, coordinadu dae su prof. Davide Maiorca e chi aiat s’obietivu de ischertare sos ses istudiantes chi ant a pigare parte a sa finale natzionale a iscuadras prevìdida pro su 30 de làmpadas in Torinu in s’àmbitu de su International labour organization.
Sos partetzipantes – binti istudiantes e noe senior – si sunt disafiados su 1 de làmpadas in sos locales de s’ex Cisapi pro su chi pertocat sos problemas de cybersecurity. Su programma de formatzione – organizadu e coordinadu dae sos dotzentes Davide Maiorca, Giorgio Giacinto, Massimo Bartoletti e Livio Pompianu – at antitzipadu sa cyber-batalla.
Cyber-batalla (denominada “Capture the flag”) in ue sos giòvanos hacker èticos Federico Dal Pio Luogo, Samuele Atzori, Diego Soi, Lorenzo Siriu, Simone Cocco e Leonardo Dessì (totus provenientes dae s’Universidade de Casteddu e dae iscolas superiores isulanas) ant mustradu unu talentu de importu mannu. Sa tzerimònia de premiatzione at bidu sa presèntzia de su pro-retore e delegadu Ict Gianni Fenu, de su presidente de sa facultade Daniele Cocco e de s’assessora de sos Afares generales Valeria Satta.
Ma, a minudu, ite est su progetu “Cyberchallenge”? «Est su primu programma de annestru gratùitu in contu de cybersecurity pro istudiantes universitàrios e de sas superiores – at naradu Giorgio Giacinto, dotzente a su Diee e deus ex-machina de s’eventu – chi punnat a sa formatzione de sos giòvanos in riferimentu a sa seguresa web e software, critografia, seguresa hardware e de sas retes, istrategias de atacu e difesa. Su progetu est organizadu dae su Laboratorio nazionale de cybersecurity, dae su Cini, cun su patrotzìniu de s’Agenzia per la cybersicurezza nazionale e de su ministeru de sa Difesa».
Dae su 2020 Cyberchallenge.it est reconnòschidu dae su ministeru de s’Istrutzione comente progetu pro sa valorizatzione de sas etzellèntzias.
Gianfranca Orunesu