Custu sàbadu b’est sa cursa de sos iscurtzos in Cabras. Is Curridoris ant a tzucare dae sa bidda pro andare currende in sa biddighedda de Santu Sarvadore de Sinis cun s’istàtua de su santu. Sa professone est nàschida in chìrriu de su 1619: pro neghe de un’atacu de sos saratzenos sa gente de Cabras at leadu Santu Srabadori e faghende burdellu e artziende prùere meda aiat ingannadu sos piratas, chi aiant crètidu de peleare cun un’esèrtzitu e fiant fuidos. Sa manifestatzione est meda sighida in sa zona e cun sos turistas chi bi sunt galu in giru, est tzertu chi b’at a èssere pùblicu meda.
De seguru turistas maicantos b’ant a èssere in Tàtari sa die a pustis pro sa Cavalcada sarda. Posca duos annos de Covid, chi at firmadu totu cantas sas traditziones pùblicas, custu 2022 las at bistas torrare. S’isfilada de sas bestimentas de sas biddas sardas nàschida pro su re d’Itàlia, est istada semper s’ocasione pro abèrrere sa tzitade a sos territòrios serentes e sas traditziones, ma mescamente pro ammustrare sas richesas de sa Sardigna a sos chi benint dae fora.
(redatzione)
Leave a comment