Su tres de cabudanni cumintzat s’editzione de su 2022 de Autunno in Barbagia. Sa manifestatzione est organizada, che a semper, dae sa Càmera de Cummèrtziu de Nùgoro e dae sa ASPEN, Azienda Speciale Promozione Economica Nuorese.
Ocannu sa primas bidda a abèrrere sas ghennas a sos istràngios at a èssere Bitzi. Pro duas dies sos bisitadores ant a pòdere connòschere sos logos prus caraterìsticos, incruidu su situ archeològicu de Romanzesu.
Semper in custu mese àteras ses comunas proponent sas bellesas issoro a sos turistas. Su deghe e s’ùndighi tocat a Olìana e a Sarule, su deghessete e su degheoto a Durgali, Orane e Teti, in fines su bintibator e su bintighimbe a Austis.
Sos apuntamentos prus fitos sunt però in santugaine, cun sa presèntzia de trèighi biddas. Si cumintzat sas primas duas dies cun Lùvula, Meana e Oroteddi. S’oto e su noe est su turnu de Gavoi, Lollove e Tonara, su bìndighi e su sèighi de Onanie e de Orgòsolo, su bintiduos e bintitrès de Brebì e de Sòrgono. Su bintinoe e su trinta sunt protagonistas Aritzu, Otzana e Dèsulu chi at a sighire a sa sola pro àteras duas dies.
In santandria su bator chimbe e ses Ovodda e Mamujada, su dòighi e su trèighi Nùgoro e Tìana, su deghennoe e su binti Atzara e su bintisès e su bintisete Ollollai.
Pro finire s’istasione su mese de nadale proponet su tres e su bator Gadoni e Onieri, dae s’oto a s’ùndighi Fonne, su deghe e s’ùndighi Ortueri e su deghessete e su degheoto si serrat cun Ortzai e Orune.
S’initziativa est s’evolutzione de s’esperièntzia de Cortes Apertas, cumintzada a sa fine de sos annos ‘90 in Olìana. Bidu s’èsitu de s’idea, in su 2001 unas cantas biddas ant unidu sas fortzas e paris cun sa Càmera de Cummèrtziu nugoresa ant fatu nàschere Autunno in Barbagia. S’islogan seberadu pro s’editzione de ocannu est La Sardegna più genuina.
(luca foddai)
Leave a comment