Su 24 de austu de su 1899 naschiat in Buenos Aires Jorge Luis Borges. A pitzocu, cun sa famìllia, aiat bìvidu in Europa, massimamente in Ginevra e in Ispagna. Su ligàmene cun su contiennte betzu est istadu semper forte pro totu sa vida sua, finas pro more de sa giaja, a chirru de su babbu, s’inglesa Fanny Haslam, chi l’aiat imparadu sa limba nadia a pitzinneddu minore.
S’esòrdiu de s’iscritore est de su 1923 cun su libru de poesias Fervor de Buenos Aires. In su 1935 essit sa regorta de contos curtzos, sa forma literària sua preferida, Historia universal de la infamia.
Dae su 1939 a su 1946 traballat comente bibliotecariu. Su regime peronista li faghet pèrdere su traballu tantu amadu, a su puntu chi aiat semper descritu su paradisu, finas si si cunsideraiat agnòsticu, pròpiu comente una biblioteca.
Bogat fama cun sas regorta de contos Ficciones e El Aleph. Collàborat meda cun s’amigu e collega Adolfo Bioy Casares, usende su pseudònimu de H. Bustos Domecq, chi firmant romanzos e contos. Intre custos si podet ammentare Seis problemas para don Isidro Parodi.
Sos insajos, dedicados pro su prus a istòria e literadura, lompent a su matessi literàriu de sas creatziones narrativas.
S’òpera de Borges, òmine de cultura ispantosa e poliglota, est caraterizada dae s’esploratzione de sos temas de su tempus e de su destinu.
Inimigu de totu sas ditaduras, si cunsideraiat un’individualista e unu liberale in sensu polìticu. Su non tènnere ideas polìticas de manca l’at privadu de su prèmiu Nobel, chi s’Acadèmia de Istocolma l’at semper negadu.
Cun sa pàtria sua, s’Argentina, at semper tentu unu raportu conflituale. Dispretziaiat su fùbalu, pro nàrrere, elementu fundamentale de sa cultura rioplatense, e s’est semper opostu a su peronismu, ideologia chi at finidu pro dominare totu s’ispetru polìticu de su paisu sudamericanu.
Sos ùrtimos annos de sa vida los at passados in Ginevra, in ue est mortu in su 1986.
(luca foddai)
Leave a comment