Cunforma a sas protestas essidas a campu sas dies coladas, paret chi sos terminales digitales de sas istatziones Eni non rispetent su plurilinguismu isulanu. Nânt chi in Santu Diadoru, chie cheret pònnere benzina cun manos suas, sos messàgios vocales los intendet in logudoresu e no in gadduresu. Su problema, però, diat pòdere abarrare mancari rispetende s’idioma sardu-corsu faeddadu dae Buduni in susu. De cale problema semus faeddende? Sa risposta l’agatamus ponende benzina (ascurtende sa boghe registrada) o leghende su comunicadu ufitziale de Eni. Chi narat: «Sos terminales digitales de prus de 1700 Eni Live Station in totu Itàlia dae oe impreant sos dialetos locales de 100 provìntzias o barda». Finas a inoghe totu bene. «Eni – sighimus a lèghere – at seberadu custa initziativa ca sa limba vernacolare est una de sas traditziones chi marcant sos territòrios sestende unu sentidu de apartenèntzia pro mèdiu de espressiones lèbias, irònicas e diretas impreadas in famìlia e in sos cuntestos informales dae su bonu de sos italianos. Gràtzias a custos limbàgios finamentas s’iscuta pro pònnere benzina est motivu pro un’iscantzada». E si in sa caminera nostra no agatamus un’istatzione Eni, beh, tando est possìbile a nos abbaidare carchi vìdeu in YouTube pro cumprèndere sa calidade de sa faina. Su chi amus lèghidu in su comunicadu est totu cunfirmadu: unu chi abbàidat a su sardu che a unu limbàgiu bambu si la diat pòdere rìere. Sos chi imbetzes gherrant pro una limba chi meresset àteru ite diant pòdere nàrrere intendende “Ashpetta pagu pagu” o “Ajo rifornisci alla pompa nummero quattro”? Semus a livellos de Paperissima Sprint, in pagos faeddos. S’ispera est chi, s’in casu in Santu Diadoru pòngiant su terminale in gadduresu, non siat una cosa chi fatzat a befe sa limba galana de Don Baignu Pes.
màuru piredda
Leave a comment