S’ùrtima die de maju su tribunale de apellu de Casteddu at dadu torra resone a s’azienda Teletron pro su sistema contra a sos fogos a infra rujos postu in Sardigna dae sos annos otanta e istudadu in su 2005. Sa Regione devet pagare sos chi deviant collaudare e gestire totu cantu. Como chi, a dolu mannu, sos fogos ant a torrare in Sardigna, bisòngiat de si dimandare ite est custu sistema e s’istòria sua.
Su sistema contra a sos fogos cun sos infra rujos l’ant proadu in Sardigna cun soddos europeos in su 1984 in tretos de Àrthana, sigomente funtzionaiat, in sos annos a pustis est istadu postu in àteros giassos, finas a lòmpere a chimbanta sensores e noe tzentrales, gastende prus o mancu bintighimbe milliones de èuros de oe. Su sistema podiat agatare unu fogu a prus de binti chilòmetros, pro more de una tecnologia ammisturada chi resessiat a reconnòschere fintzas su fumu dae a tesu e a lu sinnalare in una cartina. Como chi est como sa Regione est sighende a gastare dughentos chimbanta mìgia èuros a s’annu pro mantènnere bias sas frecuèntzias ràdiu de su sistema, fintzas si est istudadu dae deghessete annos.
Su Presidente chi at seberadu de tancare totu fiat Soru e sas resones chi ant dadu sos polìticos serentes a isse fiant, e sunt, chi su sistema daiat tropu allarmes farsos e chi no agataiat sos fogos, e cando lu faghiat fiat a trigadiu. Unu sèberu gasi de importu comente est istadu leadu? Ant fatu una chirca pro bìdere chi sos fogos sunt menguados a pustis de àere istudadu? Fintzas ca in sa delìbera n. 18 de su 31 de santugaine 2013 (comente riferit su GrIG), sa Regione naraiat chi fiat neghe de dificultades burocràticas e de ammanìgiu, non si faeddat de problemas a su sistema. Sa chistione chi ponet carchi àtera duda est chi una genia simigiante de custu sistema l’ant posta in su parcu de su Pollino in su 2015 e l’ant mantesa in cussu de s’Appia antiga s’annu a pustis e in su 2018 la cheriat pònnere fintzas Terracina.
Sa possibilidades sunt duas: o non funtzionaiat dae deretu e tando su dinari gastadu, inoghe e in aterue, est una trampa a sas càssias de s’Istadu, o, a s’imbesse, funtzionaiat e in Sardigna s’est istudadu pro non dare istorbu perunu a sos chi balàngiant cun sos fogos, comente at iscritu Sparaciari in su «Fatto Quotidiano» oe.
(redatzione)
Leave a comment