Sa tzitade de Shanghai chi tenet prus de bintighimbe milliones de abitantes, est istada serrada dae su guvernu tzinesu ca est prena de contagiados de Covid. Su problema naschet dae s’istrategia de no àere nemmancu una persone cun su Covid in totu su Paisu e, sigomente su vatzinu tzinesu no est istadu gosi bonu pro firmare sa maladia e sa variante Omicron cuitat a contagiare, su Covid s’est ispartzinende a sa lestra.
Su guvernu tando at seberadu de tancare sa tzitade: nemos podet essire dae domo sua, su màndigu est batidu dae su guvernu e chie est cuntagiadu benit leadu e batidu in logos in ue depet istare assoladu. Chie depet traballare est abarradu in su logu in ue traballat e dormit a intro de tendas o letos ammanigiados a s’aferra aferra. Sos carteris sunt istados inditados pro livellu de gravidade, e cada unu podet èssere serradu de prus o de mancu.
Su problema est chi batire màndigu a bintighimbe milliones de persones no est gosi fàtzile e b’at problema de ammanìgiu de sa situatzione. Pro su prus, però, sos ùnicos chi podent girare, francu sos funtzionàrios de su guvernu, sunt sos fatorinos, chi sunt cugugende sos bisòngios de sos tzitadinos.
Sos chi sunt istados batidos in sas domos pro si istesiare dae sos àteros, non sunt malàidos, ma petzi cuntagiados: b’at unu muntone de gente, fintzas pitzinnos, chi est istada leada a fortza e partzida dae sa famìllia sua sena tènnere nemmancu tùssiu. In prus sunt pagu contivigiados ca sa cantidade issoro est creschende a sa lestra. E paret chi s’unda de sos contàgios non si bolet firmare.
Marco Corrias
Leave a comment