4 – Imbetzes de istare in fatu a su chi ispàinant sos mèdios de comunicatzione e sas retes sotziales de ambas partes – presentende·nos·lu comente “noas” – o a carchi “anàlisi” de espertos de geopolìtica e nostàlgicos de su Patu de Varsàvia e de sa Nato essidos a campu de repente, amus disinnadu de fàghere carchi pregonta a sos chi, che a nois, est gherrende pro sa vida in Ucraina e in Rùssia.
A pustis de unos cantos tentativos, sa Commissione Sexta Zapatista est resèssida a si pònnere in cuntatu cun sa famìlia nostra de resistentes e reberdes in sas geografias chi mutint comente Rùssia e Ucraina.
5 – Resumende, custos familiares nostros, chi àrtziant sa bandera de sa A libertària, firmos abarrant: in resistèntzia sos chi nch’istant in su Donbass e in Ucraina; in reberdia sos chi caminant e traballant peri sas carreras e sos padros de Rùssia. B’at gente in Rùssia arrestada e corfada pro sas protestas contra a sa gherra. B’at mortos in Ucraina pro s’esèrtzitu russu.
Non b’est petzi su NO de sa gherra a los aunire (e a los aunire cun nois), ma finamentas su refudu de s’alliniare cun sos guvernos chi opriment a sa gente issoro.
In mesu a sa confusione e a su caos in ambas partes, sas cunvintziones issoro abarrant firmas: gherra pro sa libertade, refudu de sas làcanas e de sos istados natzione issoro e gasi de sas opressiones rispetivas chi petzi bandera mudant.
Su dovere nostru est su de los sustènnere cunforma a sas possibilidades nostras. Una paràula, un’immàgine, una melodia, una dantza, unu pùngiu artziadu, un’afrangiada – fintzas dae geografias a tesu –, cosas chi lis ànimat sos coros sunt.
Resìstere est a insìstere e a bìnchere. Agiudemus·los a custos familiares in sa resistèntzia issoro, est a nàrrere in sa gherra issoro pro da vida. Bi lu devimus a issos e a nois e totu lu devimus.
6 – Pro custu nos indiritzamus a sa Sexta natzionale e internatzionale, chi galu est a lu fàghere, pro chi, cunforma a sos calendàrios, a sas geografias e a sa moda issoro, manifestent contra a sa gherra e pro agiudare a sos ucrainos e a sos russos chi in cue gherrant pro unu mundu de libertade.
Gasi etotu aprontamus unu suportu finantziàriu pro sa resistèntzia in Ucraina pro mèdiu de sos nùmeros de contu currente chi nos ant a inditare a tempus suo.
Pro parte sua, sa Commissione Sexta de su Ezln est faghende su matessi, imbiende agigu de agiudu a sos chi in Rùssia e in Ucraina narant chi nono a sa gherra. Boghes pesamus, e boghes cherimus chi si pesent, pro esìgere: A foras s’esèrtzitu russu dae Ucraina!
-*-
Cheret chi la firmemus como. Si sa gherra sighit e, comente timimus, creschet, est capatze chi nemos b’apat pro nos contare su paesàgiu a pustis de sa batalla.
Dae sos montes de su sud est messicanu.
Subcomandante Insurgente Moisés. Sup Galeano.
Commissione Sexta de s’Ezln
Matzu de su 2022.
trad màuru piredda
Leave a comment