Inoghe sa prima parte de su comunicadu de s’Esèrtzitu zapatista de liberatzione natzionale (Mèssicu)
Perunu paesàgiu a pustis de sa batalla
(A pustis de s’invasione de s esèrtzitu russu in Ucraina).
2 de martzu de su 2022.
A sos chi ant firmadu sa Decraratzione pro sa Vida:
A sa de Ses natzionale e internatzionale:
Cumpàngias e cumpàngios, sorres e frades
Bos intregamus faeddos e meledos in contu de su chi b’at a rodeu a su presente in sa geografia chi mutides Europa.
1 – B’at una fortza agressora, s’esèrtzitu russu. E in giogu b’at interessos de su grandu capitale, a un’ala e a s’àtera. Sos pòpulos de Rùssia e de Ucraina (e, forsis luego, sos de àteras geografias, a curtzu o a tesu) sunt sos chi como sunt sufrende sos delìrios de unos cantos e sos càrculos marrascos de àtere. Zapatistas semus, e pro custu perunu sustegnu donamus a s’unu o a s’àteru istadu. Pro gasi lu donamus a sos chi gherrant pro sa vida contra a su sistema.
Cando (belle 19 annos a como) s’esèrtzitu nordamericanu ghieit s’invasione multinatzionale de s’Iraq, peri su mundu nos mobilitèimus contra a cussa gherra. Peruna persone sìnchera penseit chi s’opositzione a cussa invasione fiat comente a si nche pònnere a costàgiu de Saddam Hussein. Como, mancari non che pare, sa situatzione simigiante est. Nen cun Zelensky, nen cun Putin. Firmade sa gherra.
2 – B’at guvernos chi si sunt alliniados a un’ala o a s’àtera, faghende·lu pro càrculos econòmicos. Perunu valore umanìsticu b’at in custos guvernantes. Pro issos e pro sos ideòlogos issoro, de ingerèntzias-invasiones-distrutziones, bonas e malas bi nd’at. Sas bonas sunt sas chi aprontant sos che a issos, e sas malas sunt chi sunt acumpridas dae sos contràrios. Sas làudes a s’allega criminale de Putin pro giustificare s’invasione militare in Ucraina s’ant a bortare in lamentos cando, cun sas matessi paràulas, s’at a giustificare s’invasione de àteros pòpulos cun protzessos chi no agradessent a su grandu capitale.
Ant a invàdere àteras geografias pro los sarbare dae sa “tirannia neonazista” o pro acabbare “narco-istados” bighinos. Ant duncas a repìtere sas matessi paràulas de Putin: “andemus a denazificare” (o s’ecuivalente suo) e ant a bundare sos “arresonos” in contu de “perìgulos pro sos paisos issoro”. E duncas, a sa narada de sas cumpàngias nostras in Rùssia: «Sas bombas russas, sos coetes, sas ballas nche fertent a ue sos ucrainos sena lis pregontare sas opiniones polìticas e cale limba faeddant», ma at a mudare sa natzionalidade de sas unas e de sas àteras.
3 -. Sos grandes capitales e sos guvernos issoro “otzidentales” sètzidos sunt abarrados mirende·si·la – cando non dende·li impuntza – a custa situatzione die cun die peorende. A pustis, a invasione comintzada, a abbaidare sa resistèntzia ucraina eventuale si sunt postos carculende su chi si podiat buscare cun unu resurtadu o cun s’àteru. E a dae chi s’Ucraina resistende est, comintzende a los faturare sunt custos “agiudos” pro collire a pustis. Sa resistèntzia ucraina no at ispantadu a Putin ebbia.
Sos chi bi balàngiant in custa gherra sunt sas grandes indùstrias de sos armamentos e sos grandes capitales chi nuscant s’oportunidade de conchistare territòrios, de los destruire e de los fraigare a nou. Est a nàrrere s’oportunidade de àere mercados noos de mercantzias e de consumadores, de persones.
Leave a comment