Dae una chida s’ìsula a subra de sa Sardigna est in abbolotu mannu: manifestatziones, atzufas cun sa politzia, fogos in carreras e atacos a sas prefeturas. Dae un’ala b’at sa populatzione e sa polìtica locale, cun giòvanos medas impinnados in sas protestas, dae s’àtera sas istitutziones frantzesas in Còrsica.
Totu est nàschidu cando in su càrtzere de Arles ant iscutu Yvan Colonna chi como est in coma in sa làcana cun sa morte. Colonna fiat unu pastore, divènnidu indipendentista, postu in presone pro neghe de s’omitzìdiu de su prefetu Claude Érignac in su 1998. Isse s’est decraradu semper innotzente. Sa politzia dat sa neghe de sa violèntzia a un’àteru cartzeradu musulmanu: sos duos si sunt brigados pro resones de religione.
Sas manifestatziones sunt gasi fortes ca fiat dae meda chi sa sotziedade isulana fiat pedende a sa Frantza de fàghere ghirare a Còrsica sos presoneris de custa genia, ca est a fora de s’ìsula chi sunt prus in perìgulu. Difatis sas testimonias contant de una briga durada prus de oto minutos, in sos cales sa politzia de su càrtzere no at fatu nudda pro firmare totu cantu, fintzas si Colonna fiat suta cuntrollu istrintu.
Sas protestas non sunt galu agabbadas e cras est ammanigiada una manifestatzione manna in tzitades medas de sa Còrsica. Fintzas pro custu Gilles Simeoni, presidente de su cussìgiu corsu, est dende un’impèllida a sas istitutziones frantzesas pro chi torrent a arresonare de sas chistiones galu abertas de s’ìsula.
(redatzione)
Leave a comment