Dae una lìtera de Lenin a sos operajos e massajos de Ucraina (1919), de giudu pro cumprèndere su ruolu de Lenin a pustis de sos faedos de Putin chi li dant sa neghe de l’àere partzida dae sa Rùssia.
«Una de sas tareas de su poderiu sovièticu in Ucraina, chi meresset atentzione particulare, est sa de sa chistione natzionale. Est a nàrrere: s’Ucraina at a èssere una repùblica sotzialista soviètica indipendente federada cun sa Repùblica sotzialista federativa soviètica russa o puru Ucraina e Rùssia s’ant a unire in sa matessi repùblica? […] Su Comitadu esecutivu tzentrale de sos Soviet de totu sa Rsfsr at reconnotu s’indipendèntzia de s’Ucraina. Pro custu est cosa òvia e reconnota chi petzi sos operajos e sos massajos de s’Ucraina podent disinnare e ant a disinnare, in su cungressu natzionale issoro de sos soviet, si s’Ucraina s’at dèvere unire cun sa Rùssia o costituire una repùblica autònoma e indipendente. […] Nois cherimus una unione voluntària de sas natziones, una unione chi non permitat violèntzia peruna de una natzione contra a un’àtera, una unione chi movat dae una cunfiàntzia totale e dae una cussèntzia unitària e fraterna crara. […] Si unu comunista grandu–russu insisteret pro sa fusione de s’Ucraina cun sa Rùssia, sos ucrainos diant pòdere suspetare cun fatzilidade chi issu […] movet dae sos pregiudìtzios de su natzionalismu betzu e de s’imperialismu russu. […] Comente nche la brincamus custa difidèntzia? Comente la conchistamus sa cunfiàntzia retzìproca? […] Nois comunistas grandu-russos devimus gherrare in s’ambiente nostru, cun grandu severidade, contra a sa mìnima manifestatzione isciovinista. […] Ma nois totu cantos, russos o ucrainos, o comunistas de cale si siat àtera natzione, devimus èssere malos a tzèdere cara a sas chistiones fundamentales, essentziales, aguales pro totu cantas sas natziones: sas chistiones de sa cumbata proletària […]. Nois, operajos russos e ucrainos, devimus abarrare unidos b’apat o mancu cunfines intre s’Ucraina e sa Russia. […] Sa càusa de sos operajos e de sos massajos, sa càusa de sa vitòria contra a su capitalismu no l’amus a pèrdere pro custu».
Leave a comment