Paret fatu a posta, su sero a dae in antis de sa manifestatzione de sos pastores, in sa televisione italiana essit un’iscena chi leat in giru sos pastores sardos. Futa chi creschet cando si pensat chi est un’emitente e unu programma chi non sunt gasi a tesu dae sa parte polìtica chi aiat balangiadu de prus dae sos abbolotos de tres annos a como. Criticare su sèberu, pro càrculu polìticu, chi aiant fatu tando pastores medas non tenet sensu perunu, mescamente como. S’infadu giustu chi podent dare cussas paràulas, non depet barigare s’apretu de oe.
Denuntziamus s’ofesa e pedimus rispetu, ca bisòngiat de lu fàghere. Però nos depimus fintzas serare chi in sos mèdia sardos sa comitzidade, pro sa majoria, leat in giru sa sardidade, a s’ispissu impitende sos istereòtipos: difatis chie faeddat sardu, o un’italianu cun un’atzentu forte, no est mai gente de primore. Comente a totu calicunu lu faghet in manera inteligente, calicunu unu pagu de mancu, ma su chi mancat est una leada in giru sarda de sos terramannesos. Sa resone est ca pro sardos medas sa manera de èssere de gabbale est cussa de èssere prus italianos e meda de mancu sardos, intendende·si a intro tortos e faddidos: fintzas pro custa resone calicunu s’ammàchiat pro brullas gasi lègias. Su chi nos depet assuconare non sunt sos ratzistas addae de su mare, ma sos autoratzistas intro de nois (e non semus faeddende, de tzertu, de sos còmicos, chi traballant cun cussu chi funtzionat).
Su chi si podet fàghere de bonu est a mantènnere sa mirada a subra de su problema mannu: sas dificultades chi tenet unu setore mannu, chi contivigiat alas mannas de sa Sardigna. Impitare sa bèngia comente fogu pro los amparare mègius. Ca si sos pastores divenint dèbiles podent, cun fatzilidade, bèndere totus a sos sennores de s’energia chi sunt abramidos de terrinos in ue pònnere pannellos fotovoltaicos e palas eòlicas. Sos matessi chi como lis sunt ponende fàmene.
(redatzione)
Leave a comment