Pro more de duos finantziamentos de sa Regione e de sa Cunferèntzia Episcopale Sarda, su Coros-Anglona Terre di Tradizione e Sardegna in cento Chiese, sunt istados afidados sos traballos de restàuru de sa crèsia de Santu Micheli de Salvènneru, in Piaghe.
Sa crèsia unu tempus teniat unu campanile e a s’ala de manca una Porta Santa chi aberiant ogna annu pro unu mese pro sa festa de Santu Micheli, su 29 de cabudanni. In ie sos majorales de sas biddas de acanta lompiant, cun una rughe ruja in petorra, pro otènnere sas indulgèntzias.
Sa campagna de iscavos, cherta dae su sòtziu culturale Musas de Sardigna, de Universidade de Tàtari, Subrintendèntzia e Comuna de Piaghe, at mustradu chi sa crèsia depiat èssere prus manna meda e chi a costàgiu ddoe depiat àere unu cumbentu.
Piaghe sos meses colados est istadu intre sos fundadores de sa Fondazione del Romanico, pro su recùperu e sa valorizatzione de sas crèsias de custu istile architetònicu.
(redatzione)