Pro neghe de su Covid, manc’ocannu s’at a fàghere sa Sartìglia comente la connoschimus. Su 27 de freàrgiu e su primu de martzu sa Sartìglia si diat pòdere fàghere ma sena cursa cun sos caddos, ma petzi cun sa vestitzioni de is componidoris, cun s’isfilada de bestimentas e costùmenes e cun s’incròciu de sas ispadas. Custu est su progetu de s’amministratzione e de sa Fundatzione Sartìglia, unu disinnu minimadu chi no est mancu cunfirmadu, ca como depet èssere atzetadu dae su prefetu e dae sa Cuestura.
Custa possibilidade lassat ifadados ca benit cando semus abbaidende, cada sero, su fèstival de Sanremo, un’ispetàculu in unu teatru serradu e prenu de gente; cando su guvernu est inghitzende a illebiare is medidas sanitàrias in sas iscolas e cando dutores medas sunt narende chi s’apretu de custa unda est agabbende. Paret chi sa normalidade potzat torrare, francu pro is festas traditzionales sardas. L’ischimus chi est pretzisu compidare e istare abbistos, e bisòngiat de lu fàghere, ca sighire a mutzare eventos de importu gasi mannos, no podet èssere sa sèmida giusta.
(redatzione)
Leave a comment