S’ischiat chi fiat lompende un’inflatzione manna (l’aìamus iscritu fintzas nois inoghe), ma como si sunt intendende sas cunseguèntzias, mescamente in sos setores prus ligados a àteros. Pro esempru, su trigu est prus caru de prima e cun isse su pane e sa pasta. Fintzas s’Arborea, azienda manna de màndigos, si nche est chescende de sas dificultade chi est sufrende in custos meses. Pro su prus, sa neghe est de sa crèschida de sos prètzios de s’energia. Sos carburantes, chi in pandemia sunt istados consumidos pagu e nudda, como sunt torrados a èssere gastosos meda e fintzas s’eletritzidade at sighidu custu caminu: pagos biàgios, butegas e ufìtzios tancados ant mudadu sa cantidade de produtzione e su balàngiu de sos chi ghiant custos setores.
S’apretu de s’inflatzione in Itàlia est peoradu dae su problema mannu chi sos salàrios sunt firmos, e antzis sunt minimados, dae su 1990 a su 2020: s’ùnicu Paisu de s’Europa cun un’andanta gasi, narat s’OCSE. Como chi s’inflatzione est creschende est pretzisu chi ant a crèschere finamentas sos istipèndios. In custa manera però at a sighire a crèschere s’inflatzione in un’ispirale chi non at a isorvere sa chistione.
Un’ispera podet bènnere dae su dinari de su fundu PNRR. A sas comunas pertocant fundos mannos, ma, comente narat s’ANCI, fartat sa gente esperta, sas professionalidades pro los ammanigiare in sos entes. Bi diat chèrrere concursos pro nde agatare, ma pro como sunt andados male, ca sas persones de giudu sunt in chirca de unu logu seguru e pagadu bene, non de precariedade. S’arriscu est chi sos soddos potzant abarrare in sas càscias pùblicas, o torrare a dae segus.
(redatzione)
Leave a comment