Pro chi sos sardos apant su de baranta cabos de s’istadu nàschidu in Casteddu 698 annos a como, sighende s’allega casuliana de su guvernadore Christian Solinas, cheret chi isetent sos concruos de su segundu mandadu presidentziale de Sergio Mattarella.
A pustis de sos nòmenes de su presidente de su Consìgiu Mario Draghi, de sa presidente de su Senadu Elisabetta Casellati e de sa diretora de sos Servìtzios segretos Elisabetta Belloni, sos partidos ant disinnadu chi cadaunu de custos tres si nch’abarret sètzidu in ue nch’est. E chi duncas sa matessi sorte tochet a su de 11 incuilinos republicanos de su Quirinale. Un’òpera maistra o unu fallimentu de sa polìtica?
Diat èssere fàtzile a rispòndere, ma pro lu fàghere cun profetu cheret chi abbaidemus a s’àtera chistione in campu, a su fatore Draghi, a su chi a pustis de Giuseppe Conte pariat s’òmine de sa providèntzia e chi como at a dèvere sighire a gestire comente primu ministru su chi tenet in suta de ogros (in teoria finas a su mese de martzu de annoas). Cun sa possibilidade manna chi li mènguet su cunsensu suo. Ca l’ischimus chi sa pandemia est galu una realidade e chi su benidore econòmicu ponet prus de una duda a sos detzisores.
Pro unos cantos analistas, cun Draghi chi si nch’abarrat in ue est, si nche morit sa prospetiva de una mudada sustantziale de s’ordinamentu republicanu de s’Italia, si nche ponet a banda su perìgulu de una deriva presidentzialìstica. Ma custa deriva no est un’ipòtesi ligada a Mario Draghi “al colle” ebbia.
Sas dificultades de agatare unu nòmene alternativu a Mattarella nd’ant torradu a bogare a campu sa chistione de s’eletzione direta de sa prima càrriga de s’istadu (iscarrighende responsabilidades in palas de sa gente, comente cun sa pandemia).
De prus, si est beru su chi si narat, est a nàrrere chi Draghi abarrat primu ministru a cunditzione de unu Mattarella bis (o de una presidèntzia de Giuliano Amato), tando sa deriva est finamentas prus chi non presidentzialìstica. Si dae su Quirinale podiat nominare su sutzessore suo (cosa inèdita ma a norma cun su detadu), como, abarrende·nche in Palatzu de Chigi at invertidu sas dispositziones de s’artìculu 92 de sa Costitutzione.
Art. 92. […] Il Presidente della Repubblica nomina il Presidente del Consiglio dei ministri e, su proposta di questo, i ministri.
Serrende·la: in su “Gattopardo” de Tomasi di Lampedusa si narat chi totu mudat pro chi nudda mudet. Cun Draghi e Mattarella cada unu in sa cadrea sua, nudda mudat ma totu est mudende.
màuru piredda
Leave a comment