Eris su diretore de sa AOU de Tàtari, dot. Francesco Bandiera, at iscritu a su sìndigu de sa tzitade, a su prefetu e a s’assessoradu regionale de sa sanidade pro pedire chi sos malàidos de Covid chi sunt lompende a Tàtari siant istesiados fintzas a Terranoa e Nùgoro. Custu ca s’istrutura tataresa est prena e sas operatziones e sas visitas normales sunt in arriscu de si firmare. In sos repartos Covid, fintzas cussos abertos dae pagu, sos letos abarrados bòidos sunt pagos de a beru e su personale, chi si nche ismalaidende, giughet unu bàrriu de traballu tropu mannu.
Su problema naschet pro duas resones. Sa prima est chi sa variante omicron, mancari siat grae unu pagu de mancu de su Covid normale, est contagiosa meda de prus. Tando su nùmeru de sos malàidos est prus artu ca bi l’ant belle totu e, bisòngiat de ammentare, chi su prus de sos ricòveros est de gente chi non si nche est vatzinada o, fintzas cun su vatzinu, est dèbile meda. S’àtera resone, e prus de importu, est chi s’organizatzione de sa sanidade sarda est pilisada meda, cun su personale chi non bi est, cun repartos Covid ammanigiados dae dutores e infermieris chi at dèvidu disamparare sos repartos issoro.
(redatzione)
Leave a comment