Da carchi dies si nde est incumintzadu a faeddare: s’aeroportu de Casteddu podet devènnere privadu e andare a su matessi grupu chi tenet giai su de s’Alighera e su de Terranoa. In custa manera totus sos aeroportos sardos ant a èssere in sas manos de un’ùnicu grupu finantziàriu italo-americanu.
Difatis F2I Ligantia controllat, cun su setantunu pro chentu, s’aeroportu Costera de su coraddu e cun s’otanta su Costa Smeralda. In ambos duos su restu de sa propiedade l’at sa Regione o àteros entes de su logu. S’aeroportu de su Masu, a s’imbesse, est de sa Camera de Cummèrtziu de su cabu-de-logu de Sardigna. Dae cantu s’ischit Ligantia, cun s’agiudu de BlackRock (unu fundu americanu), est in bidea de comporare una parte de propiedade (non s’ischit cantu) e fraigare un’istrutura chi potzat ammanigiare totus sos iscalos sardos.
Su pidinu est mannu, ca in custa manera chie at su poderiu de seberare cantu abèrrere e cantu serrare sas giannas de su chelu sardu? Cale capatzidade at a abarrare in sas manos nostras? Una sotziedade a tesu meda dae s’ìsula at a sighire sos interessos suos o sos de sos sardos?
(redatzione)
Leave a comment