A su fritu e in s’astradu, comente Gesùs, istant sos migrantes chi comente una bòcia rimbaltzant dae sa làcana de Polònia a sa de sa Bielorùssia. Eris est morta una fèmina, mama de bator fìgios e unu in sas intragnas suas, pro neghe de su fritu e de su fàmene. Pitzinneddos, treme treme, cun sas famìllias issoro istant cuados in sos padentes e in sas tendas.
Sa situatzione est nàschida ca su ditadore de sa Bielorùssia cheret produire un’apretu a s’Europa, e tando est batende in su Paisu suo migrantes dae zonas de gherra cun aèreos e los est mandende contra a su muru chi at fraigadu sa Polònia. Sa resone est chi s’Unione Europea at postu santziones mannas a su regime de Lukašėnka, ma sa neghe no est sua ebbia. S’Europa si nche est tancada, timende persones chi fuint dae gherras e poberesa, refudat de los fàghere intrare e los lassat mòrrere.
Semus a Nadale e sunt giai incumintzadas sas cantones chi faeddant de Gesùs chi istat in sa gruta, callentadu dae un àinu e dae unu boe. Lu cantamus, ma non resessimus a lu reconnòschere in sos pitzinnos comente a isse.
(redatzione)
Leave a comment