Mark Zuckerberg, su mere de sas retzas sotziales prus de importu, at decraradu chi sa sotziedade sua at a furriare nùmene: dae Facebook a Meta. Ite at a cambiare pro chi impreat custu traste? Pro ite pròpiu como custa mudada? Cale sunt sas punnas de sa ghia de unu setore intreu?
Su progetu chi Zuckerberg tenet in conca est de fàghere devènnere s’esperièntzia de sas retzas sotziales prus funguda pro more de sa realidade virtuale. Onni persone no at a intrare in una bacheca, comente a como, ma in unu mundu diferente dae su beru in ue pòdere agatare àtera gente caratzadas cun su profilu suo, informatzione, publitzidades e mertzes de comporare. Unu mundu parallelu, de propiedade de Facebook antzis Meta, in ue bìvere a fora de su reale. B’at a resèssere? Non lu podimus ischire e como nos paret fintzas una mesa brulla, ma chie podiat immaginare, petzi bìndighi annos faghet, sa manera nostra de oe de istare cun sa tecnologia?
Pro como, però, totus at a abarrare comente est. Facebook, cussu chi impitamus cada die, no at a mudare nùmene e nemmancu sa manera de impreu. Galu pro carchi annu at a sighire su surcu sinnadu dae sa nàschida sua, su chi de seguru faghet fàghere dinari meda a sa sotziedade de Zuckerberg.
Ma comente mai custa decrarada de importu est essida a campu pròpiu sa chida colada? Sa resone est chi una traballadora de Facebook, Frances Haugen, at bogadu documentos chi proant chi s’azienda ischiat chi sas retzas sotziales faghent male meda a sos giovaneddos, ischiat chi sas noas fartzas fiant fatende dannu meda, ischiat fintzas chi pro neghe issoro fiant capitende trìulos mannos in carchi Paisu. Però non proant petzi custu, sos documentos contant fintzas chi sas ghias de s’azienda non ant fatu nudda pro firmare o acontzare sos males chi fiant naschende, ma antzis chi b’ant balangiadu a subra.
Si custa est sa conca de chie at a fraigare su mundu virtuale de cras, su logu in ue sos nebodes nostros ant a bìvere, ite nos depimus isetare?
(redatzione)
Leave a comment