Non sunt sas provìntzias ebbia a torrare a bachile. Finamentas sas pensiones de sos onorevoles, abolidas sete annos a como, nde sunt essidas a pìgiu che cocorra a pustis pròidu. Sa règula introduida cun sa lage omnibus pertocat a custa ma finamentas a sa legisladura colada. Ite narat? Chi «movende dae su comintzu de sa de 15 legisladuras, su regime presidentziale de sos consigeris regionales e de sos assessores tècnicos est de caràtere contributivu». Chie l’at propònnidu? Stefano Tunis (Sardegna 20Venti), Angelo Cocciu (Forza Italia), Giorgio Oppi (Udc), Francesco Mura (Fratelli d’Italia) e Franco Mula (Psd’Az) cunforma a un’ischema de testu de lege aprovadu in Conferèntzia de sas Regiones e de sas Provìntzias Autònomas su 2019 cun s’artìculu 6.4 chi prevìdet unu contributu a càrrigu de su Consìgiu regionale: «Sa cuota de contributu a càrrigu de su consigeri est de s’8,80% dae sa base imponìbile; sa cuota a càrrigu de s’Assemblea legislativa est de 2,75 bortas sa cuota a càrrigu de su consigeri». De prus. In un’àteru emendamentu b’at iscritu chi «sas indennidades e sos rimbursos de sos consigeris regionales sunt torrados a valutare annu cun annu cunforma a sa variatzione rilevada dae s’Istat, si positiva, de s’ìnditze de sos prejos a su consumu». Dae su verbale de sa setziada e dae sa nota imprenta paret chi non nd’apant nemmancu faeddadu in àula.
redatzione
Leave a comment