Eris mangianu in sa corte de apellu de Tàtari, sos giùighes ant isseberadu de tasire su protzessu pro intregare a s’Ispagna su Presidente betzu de sa Generalitat catalana, Charles Puigdemont. A fora de su tribunale b’aiat una manifestatzione manna de sos indipendentistas sardos, catalanos e corsicanos, pro sustènnere Puigdemont e su deretu de sos pòpulos a s’autodeterminatzione.
Sa faina protzessuale no est gasi fàtzile ca intritzat còdighes de Paisos diferentes e chistiones ligadas a s’Unione Europea. Puigdemont difatis est istadu cundennadu dae sa giustìtzia ispagnola pro su referendum ammanigiadu in Catalugna in su santugaine 2017, ma no est resèssida a lu arrestare. Pro custu sos giùighes ant annoditadu un’òrdine d’arrestu europeu, ma dae deretu su Bèlgiu, in ue est andadu Puigdemont, no at sighidu sa voluntade ispagnola, dende·li amparu.
In su 2020 Puigdemont est divènnidu europarlamentare, càrriga chi tenet s’immunidade. S’Ispagna pagu a pustis aiat fatu recursu pedende una suspèndida de custu deretu a su tribunale europeu, chi fintzas a como no at isseberadu. In su mentres nen sa Frantza e nemmancu sa Germània aiat arrestadu su polìticu cando est intradu in cussos Istados, a su revessu de comente at fatu s’Itàlia in Sardigna.
S’arrestu ponet unu problema prus che totu a s’Europa: Puigdemont tenet o nono s’imunidade europarlamentare o est unu criminale? Ma mescamente ite cheret fàghere s’Europa cun sa chistione catalana e cun su deretu a s’autodeterminatzione?
(redatzione)
Leave a comment