Sos prèmios los ant a dare su 30 de santugaine, e non prus su 16, comente aiant naradu a comintzu. Ma su prèmiu internatzionale de Garteddi, “Canne al vento”, tenet giai sos nùmenes de sos ses finalistas. Tres, cunforma a su bandu, pro cada setzione: una pro sos contos in italianu, in inglesu, in frantzesu e in ispagnolu; una pro sos contos in limba sarda. A sa finale de sa prima setzione bi lompent Carla Cristofoli, sarda in Parigi (“Strade infinite”), s’ispagnolu Francisco López Barrios (“Cara de piedra”) e s’inglesa Fiona Vigo Marshall (“Koffi and Mouchette”). Sos finalistas de sa setzione sarda sunt Antonio Maria Masia (“Sas tres sorres de sa ‘Idda mia”), Giovanni Piga (“In su respiru de Galte…”) e Maria Cristina Serra (“Froris de proinca”). Los at annuntziados sa presidente de sa giuria Neria De Giovanni chi at traballadu in pare cun sos àteros giurados Anthony Muroni (giornalista, iscritore, presidente de su Cda de sa fundatzione Mont’e Prama e diretore artìsticu individuadu dae sa Provìntzia de Nùgoro pro sos festamentos deleddianos), Angel Basanta (crìticu literàriu e dotzente de Literadura ispagnola in Madrid), Pierfranco Bruni (giornalista, iscritore e dirigente archeològicu de su MiC) e Andrea Guiati (professore ordinàriu in su Buffalo State College de New York). Gasi De Giovanni pro sa setzione sarda. «Sutalineende sa richesa de sas variantes de sa limba, amus chertu propònnere una trìbide chi rapresentet sas diferentes e sas prus importantes zonas linguìsticas de s’ìsula». Est a nàrrere logudoresu, nugoresu e campidanesu.
redatzione
Leave a comment