Su fine chida coladu sa Germània at votadu pro cambiare sa guvernu e su parlamentu de s’Istadu Federale e pro sa prima borta dae meda non bi fiat Angela Merkel candidada. Sos resurtos sunt de echilìbriu: su tzentru dereta at pèrdidu e su tzentru manca bìnchidu ma sas duas fortzas sunt lòmpidas a curtzu de a beru.
Su SPD, su partidu prus mannu de su tzentru manca, at otentu su resurtu prus bonu a cunfrontu de bìndighi annos, 26%, in su mentres su CDU, su prus mannu de tzentru dereta e su chi fiat de Merkel, sa pertzentuale de votos prus minore dae su 1949, su 22,30%. Sa voluntade de cambiamentu sena bortulare su sistema paret crara fintzas dae sos resurtos de sos àteros partidos: sos birdes e sos liberales ant logradu su resurtu prus bonu de semper e sunt prontos a intrare in su guvernu nou. A su revessu, sas àteras fortzas, sa manca e sa dereta estrema, ant menguados sos votos e sos sègios in su Bundestag, su parlamentu tedescu.
Como sa ghia de su SPD, Olaf Scholz, tenet sa responsabilidade manna de fraigare unu guvernu nou chi depet proare a mantènnere unu livellu de istabilidade e influèntzia chi potzat assimigiare a cussos de Angela Merkel chi pro bìndighi annos est istada sa responsàbile prus manna de sas prenetas de s’Europa intrea.
(redatzione)
Leave a comment