Oe si torrat a iscola e s’at a torrare a la fàghere in presèntzia, e giai fiat ora. B’at a èssere su tzertificadu birde pro sos mannos e sas maschereddas pro cale si siat persone chi intrat in sas istruturas. In sos istitutos prus mannos s’at a intrare a motas cun oras diferentes. Sa normalidade est a curtzu de a beru e bisòngiat de isperare chi colende su tempus su de sa DAD e de s’iscola prena de timoria siat a abarrare che ammentu lègiu.
Sa chi no paret sanada est sa mancàntzia de s’imparu de su sardu in iscola che faina normale. Àteros logos tenent sa possibilidade de mìntere sa limba de su logu in s’iscola; nois, chi semus sa minoria linguìstica prus manna de Itàlia, non bi la faghimus. Sunt amparados de prus su furlàn e su ladinu, cust’ùrtimu cun pagos faeddadores de a beru, chi tenent fintzas mastros cun una classe de cuncursu tot’issoro.
Esistit sa libertade de insegnamentu pro sos mastros, chi duncas podent propònnere carchi cosa de limba o de cultura sarda, ma est una chistione de gana e de cussèntzia de cada unu. Pro su prus abarrat galu sa birgòngia de sa limba e de sa cultura sarda e sos pitzinnos l’intendent custu sentidu. Calicunu narat chi est fintzas pro neghe de custa ausèntzia chi in medas sardos e sardas si nde fuint dae s’iscola.
(redatzione)
Leave a comment