Pro s’apretu in s’ispidale de s’Alighera, in ue mancaiant dutores, in s’ispidale de Ìtiri Cannedu ant tramudadu passèntzies cun ricòveros longos in àteras istruturas. Custu est un’esempru, ma si podet faeddare fintzas de su Santu Camillu de Sòrgono e de su Dettori de Tèmpiu, de ite est capitende in sa Sanidade de Sardigna: ispidales chi sunt in arriscu de tancare o de menguare sa capatzidade issoro de curare sa populatzione, giòvanos fuende dae s’ìsula chi abarrat sena professionistas, biddas sena bàrdias mèigas. Una situatzione chi est divènnida prus grae meda cun su Covid e chi est peorada pro neghe de una riforma arressada pro sa pandemia.
Como chi su virus paret chi siat torrende borta, sa riforma de sa Sanidade podet inghitzare. Dae ghennàrgiu 2022 s’ASL ùnica diat dèvere èssere remplasada dae oto ASL ligadas a sas oto provìntzias betzas, a subra de custas b’at a èssere s’ARES: un’istrutura ùnica chi mantenet carchi tareas de s’òrganu betzu. S’ARES at a èssere s’ùnica a fàghere sos achistos e a seberare su personale, siat pro sas istruturas tziviles chi in cussas universitàrias (in Casteddu e Tàtari) e de primore (su Brotzu de Casteddu).
Su dinari at a èssere partzidu mescamente pro populatzione, pro sa mannària de su personale sanitàriu, pro su nùmeru de istruturas de su logu e de prestatziones frunidas. A Casteddu ant a andare su prus de sos fundos, belle unu milliardu, a Tàtari belle seschentos milliones. Sa de tres at a èssere Nùgoro cun treghentos setantasès milliones, chi bàrigat Aristanis e Terranoa chi abarrant cun treghentos. Su Sulcis at a otènnere dughentos sessanta milliones, su Campidanu de mesu chentu otanta e s’Ogiastra chentu bintiduos.
S’ispera de totus est chi custa riforma boghet fora sa Sanidade sarda dae custa situatzione de trìulu e apretu e chi non siat petzi chistione de polìtica e de cadreas.
(redatzione)
Leave a comment