Forsis dae su 15 de santugaine non b’at a èssere lìnia peruna de aèreos in continuidade territoriale intre Sardigna e Terramanna. Alitalia est tanchende e ITA, sa cumpannia chi at a collire s’erèntzia sua, non podet leare cussas tratas. Posca chi sos navios ant abbandonadu su portu de Arbatassa, chi galu non si cumprendet comente at a èssere s’ierru intre Portu Turre e Gènova e cun noas a fitianu de biàgios a trigadiu, como fintzas sa garantzia de agatare bolos pagos gastosos paret chi siat andende a s’ispèrdere.
Si faeddat de bandos noos ma, si gasi est, s’arriscu est de istare sena bolos giuados pro ses meses. S’arresonat de una cumpannia sarda pro sos collegamentos in continuidade, ma no est cosa chi naschet dae una die a s’àtera. Forsis, narat calicunu, b’at un’iscòticu in su bandu betzu chi podet mìntere ITA a intro de sa continuidade.
Custa situatzione no est neghe de su guvernu, ma est frutu de su modu de fàghere italianu: paga organizatzione e burocratzia meda, pagu contivìgiu de su benidore, mirada curtza e pagu impinnu. Comente narat cuddu: “una cosa fata a s’italiana”. Como nois sardos amus a andare a s’aparpu fintzas a cando custa emergèntzia at a iscopiare, posca s’at a isòrvere a s’aferra aferra, mancari in una manera trota e cun calicunu chi at a aboghinare a su miràculu.
(redatzione)
Leave a comment