Un’Internatzionale contra a su virus?

Cando faeddamus de Internatzionale s’ogru nche ruet a su movimentu operaju. E sunt duas sas cunvivèntzias chi ant caraterizadu dae semper cussa istòria peri su mundu: sa chi b’amus àpidu e b’amus intre s’orizonte sotzialista (a un’ala) e sa polìtica reformista chi a cussu orizonte nch’at istesiadu e nche l’istèsiat (a s’àtera); sa chi b’amus àpidu e b’amus intre s’anàlisi teòrica de su caràtere internatzionale de s’aversàriu (a un’ala) e s’atzione localizada ebbia de su sugetu trasformadore (a s’àtera). Duncas su bonu de sas solutziones adotadas o inditadas, a manca, dae sas làcanas istatales non nch’essint. E duncas dae sa gestione de su chi su chi su capitale nos permitit, inoghe e petzi inoghe, non nch’essimus. E puru su virus, presentende·si comente atore sotziale internatzionale, mancari sena cussèntzia de lu èssere, nos at ofertu deretu sa possibilidade de nche barigare su caràtere natzional-reformìsticu de cussas duas cunvivèntzias. Ca sa batalla cheret fata a issu e cheret fata in totue. E mescamente cheret fata a chie, in totue, non cheret firmare s’ispainada sua ca s’interessu printzipale est su de bi balangiare dae custa pandemia. Ma mancari custa possibilidade oferta·nos dae su virus, su bonu de sas allegas a manca non pertocant sa punna de su vatzinu pro sos paisos de su “sud de su mundu”, est a nàrrere dae ue nd’ant a essire a campu sas peus variantes. Nen custas allegas “de manca” pertocant sa punna de nde li bogare dae francas s’indùstria farmatzèutica a sos meres. Sunt paràulas de òrdine unificantes a livellu internatzionale e nemos nos impedint de las impreare movende dae su particulare. Ma si abarramus in su particulare ebbia, mancari faeddende de cosas chi meressent allega, no amus a àere perunu assentu internatzionale contra a custu virus e nemmancu contra a chie, in totue, non cheret firmare s’ispainada sua ca s’interessu printzipale est su de bi balangiare dae custa pandemia. E si sa possibilidade oferta·nos dae su virus non nos nche ponet in cuss’àndala, àsiu nde tenimus de nos inchietare contra a su capitalismu internatzionale.

màuru piredda