Duos diferentes biàgios a Sardigna, unu a pustis de deghe annos dae s’àteru, aiant dadu a Carlo Levi, connotu massimamente pro Cristo si è fermato a Eboli, s’ocasione de cumpònnere Tutto il miele è finito, crònaca de custa esperièntzia umana.
Sa Sardigna de su 1952, sa prima borta de s’iscritore in s’Ìsula, fiat galu una terra premoderna, in ue in sas biddas si ballaiat in carrera.
Sa prima tapa fiat istada in Casteddu, giai belle torradu a nou a pustis de sos bombardamentos de sa gherra ma in ue a su matessi tempus ddo’aiat gente bivende in sas grutas, pòveros o abarrados sena de domo.
Ma sa Sardigna chi prus atiraiat a s’iscritore fiat sa de sa Barbàgia. Orgòsolo e Orune massimamente fiant abarrados in sa mente de s’artista.
Fiat cussa arcaitzidade chi ddi praghiat a Levi, prus chi no una modernidade artefata che a sa de Carbònia.
Giai a distàntzia de deghe annos si cumintzaiant a bìdere sos cambiamentos, cun sos emigrados a Germània e, a chirru de sa Gaddura, sas primas rastas de s’ispeculatzione edilìtzia ligada a su turismu.
Su tìtulu benit dae unu versu de un’atìtidu chi s’iscritore aiat intèndidu in Orune. E Orune fiat su nùmene chi aiat dadu a una corroga, regalu de unu pitzinnu, chi nch’aiat leadu cun issu a Roma.
Levi bidiat craru craru s’esistèntzia de duas Sardignas, una firma in su tempus e in sas leges suas, diferentes dae sas de s’istadu, s’àtera chi, però, non fiat giai prus Sardigna, comente narat in su libru de Terranoa, dae in ue aiat leadu sa nave pro torrare a terramanna.
A metade intre su diàriu de biàgiu e s’anàlisi sotziològica, Tutto il miele è finito faghet finas una fotografia de sa situatzione de sas alas de intro de Sardigna de cuddu tempus: emigratzione maschile in sas fàbricas de su nord Europa e emigratzione feminile in sas domos ricas de Roma.
Totu custu però est ammuntadu dae unu belu de poesia, cudda trista de sos atìtidos e cudda allegras de sas festas, chi tantu fiat pràghida a s’iscritore e pintore torinesu.
(gianni muroni)
Leave a comment