Fùbalu: s'Òlbia at a faeddare in sardu

Su chi sighit esst su comunicadu de sa sotziedade de fùbalu de Terranoa

S’ Olbia Calcio, paris cun Amistade, chi dae trinta e passa annos cuntivizat s’impitu de sa limba sarda, est biada de annuntziare un’assotziu nou chi mirat a ajuare su faeddu bilingue in su mundu sportivu. In cumone cun Amistade, su club olbiesu, si pròponet de faghere colare s’impitu de sa limba sarda, in sas sèmidas de sa comunicatzione social. Custu cheret essere unu primu passu, ind’unu caminu pensadu pro una créschida sotziale e culturale in su mundu sportivu de su logu, gratzias a sa limba sarda.

“Dae tempus meda – ispiegat Mateu Sechi, mastru de marketing e comunicatzione de su club nostru – amus desizadu de poter impitare sa limba nostra in manera ufitziale e oe, gratzias a sa s’esperientzia, a s’ischire e sa passione de s’assotziu de Amistade, s’idea est comintzende a bìdere lughe. Sa limba est su connotu chi nos acomunat ind’unu mundu solu e amus cherfidu donare valore e forza a sa missione de s’Olbia, chi est cussa de ajuare sa creschida e su metzoru sportivu e professionale de sa pitzinnia de sa Gaddura e de sa Sardigna intrea, a die de oe e in su tempus bennidore puru.  Su mundu sportivu potet dimostrare cantu siat bia sa limba sarda e cantu potet galu contare in sa vida nostra de ‘onzi die”.

“Amus acoglidu cun cuntentesa manna, su cumbidu de s’Olbia Fubbal – narat Mario Bua Capitta, presidente de Amistade – e ringratziamus s’iscuadra olbiesa cun totu su coro. Amistade naschet in su 1993 e benit battijada dae unu babbu mannu, Massimo Pittau, chi nos donedit unu libberu, nou a sos tempos, Ulisse e Nausica in Sardegna. Dae sa die, pro trin’annos chentza pasu, amus semper chircadu de innestare in s’arvure de sa mitologia, sas taleas de unu tempus bennidore liberu, prosperu e modernu. Pro custu namus gratzias, ca s’Olbia sportiva nos donat unu mitu, forsis ereditadu dae su connotu religiosu, inue potere sighire a investire, in identidade linguistica e culturale“.

redatzione